azal se baada-e-hasti ki arzani nahin jati

azal se bāda-e-hastī kī arzānī nahīñ jaatī

is arzānī pe bhī us kī farāvānī nahīñ jaatī

hujūm-e-ranj-o-ġham ne is qadar mujh ko rulāyā hai

ki ab rāhat kī sūrat mujh se pahchānī nahīñ jaatī

huī thī ik ḳhatā sarzad so us ko muddateñ guzrīñ

magar ab tak mire dil se pashemānī nahīñ jaatī

chaman-zār-e-tamannā kā faqat ik phuul murjhāyā

usī din se mire gulshan kī vīrānī nahīñ jaatī

mire ashkoñ se kyā nisbat tumheñ ai anjum-e-gardūñ

ki un kī roz-e-raushan meñ bhī tābānī nahīñ jaatī

mirī vahshat meñ shāyad aa chale andāz-e-ra.anā.ī

ki zulfoñ kī tarah dil kī pareshānī nahīñ jaatī

azal se baada-e-hasti ki arzani nahin jati

is arzani pe bhi us ki farawani nahin jati

hujum-e-ranj-o-gham ne is qadar mujh ko rulaya hai

ki ab rahat ki surat mujh se pahchani nahin jati

hui thi ek KHata sarzad so us ko muddaten guzrin

magar ab tak mere dil se pashemani nahin jati

chaman-zar-e-tamanna ka faqat ek phul murjhaya

usi din se mere gulshan ki virani nahin jati

mere ashkon se kya nisbat tumhein ai anjum-e-gardun

ki un ki roz-e-raushan mein bhi tabani nahin jati

meri wahshat mein shayad aa chale andaz-e-ranai

ki zulfon ki tarah dil ki pareshani nahin jati