baat karne ka nahin samne aane ka nahin

baat karne kā nahīñ sāmne aane kā nahīñ

vo mujhe merī aziyyat se bachāne kā nahīñ

duur ik shahr hai jo paas bulātā hai mujhe

varna ye shahr kahīñ chhoḌ ke jaane kā nahīñ

kyā yūñhī raat ke pahlū meñ kaTegī ye hayāt

kyā koī shahr ke logoñ ko jagāne kā nahīñ

ajnabī log haiñ maiñ jin meñ ghirā rahtā huuñ

āshnā koī yahāñ mere fasāne kā nahīñ

ye jo ik shahr hai ye jis pe tasarruf hai mirā

maiñ yahāñ koī bhī dīvār banāne kā nahīñ

baad muddat ke jo aayā thā vahī lauT gayā

ab yahāñ koī charāġhoñ ko jalāne kā nahīñ

aane vaalī hai na.ī sub.h zarā der ke baad

kyā koī rāh-e-tamannā ko sajāne kā nahīñ

baat karne ka nahin samne aane ka nahin

wo mujhe meri aziyyat se bachane ka nahin

dur ek shahr hai jo pas bulata hai mujhe

warna ye shahr kahin chhoD ke jaane ka nahin

kya yunhi raat ke pahlu mein kaTegi ye hayat

kya koi shahr ke logon ko jagane ka nahin

ajnabi log hain main jin mein ghira rahta hun

aashna koi yahan mere fasane ka nahin

ye jo ek shahr hai ye jis pe tasarruf hai mera

main yahan koi bhi diwar banane ka nahin

baad muddat ke jo aaya tha wahi lauT gaya

ab yahan koi charaghon ko jalane ka nahin

aane wali hai nai subh zara der ke baad

kya koi rah-e-tamanna ko sajaane ka nahin