bata tu dil ke bachane ki koi rah bhi hai

batā tū dil ke bachāne kī koī raah bhī hai

tirī nigāh kī nāvak-fagan panāh bhī hai

sazā ke vāste iqrār bhī gunāh bhī hai

aur ek tum sā koī dūsrā gavāh bhī hai

ḳhudā kā ghar bhī hai dil meñ butoñ kī chaah bhī hai

sanam-kada bhī hai dil apnā ḳhānqāh bhī hai

ajiib haal hai duniyā-parast logoñ kā

ma.aad kā bhī ḳhayāl aur fikr-e-jāh bhī hai

ilāhī ḳhizr kahūñ ishq ko ki ġhol-e-tarīq

ki rāhbar bhī ye hai aur sadd-e-rāh bhī hai

usī pe marte haiñ ham aur usī ko chāhte haiñ

vahī hai aalim o daanā vahī gavāh bhī hai

gale se aa ke lipaT jā ḳhudā ko maan o but

hai aaj tujh pe bhī jauban urūj-e-māh bhī hai

murād tujh se na māñgūñ to kis se māñgūñ maiñ

tikaḌ-gadā tire dar kā gadā bhī shaah bhī hai

agarche dil se huuñ banda butoñ kā maiñ lekin

zabāñ pe kalma-e-tahrīm-e-lā-ilāh bhī hai

gunāh baḳhsh de 'anjum' ke ai rahīm o karīm

ki pur-gunāh bhī hai aur uzr-ḳhvāh bhī hai

dikhā.egā kise mahshar meñ apnā muñh 'anjum'

siyāhkār bhī hai aur rū-siyāh bhī hai

bata tu dil ke bachane ki koi rah bhi hai

teri nigah ki nawak-fagan panah bhi hai

saza ke waste iqrar bhi gunah bhi hai

aur ek tum sa koi dusra gawah bhi hai

KHuda ka ghar bhi hai dil mein buton ki chah bhi hai

sanam-kada bhi hai dil apna KHanqah bhi hai

ajib haal hai duniya-parast logon ka

maad ka bhi KHayal aur fikr-e-jah bhi hai

ilahi KHizr kahun ishq ko ki ghol-e-tariq

ki rahbar bhi ye hai aur sadd-e-rah bhi hai

usi pe marte hain hum aur usi ko chahte hain

wahi hai aalim o dana wahi gawah bhi hai

gale se aa ke lipaT ja KHuda ko man o but

hai aaj tujh pe bhi jauban uruj-e-mah bhi hai

murad tujh se na mangun to kis se mangun main

tikaD-gada tere dar ka gada bhi shah bhi hai

agarche dil se hun banda buton ka main lekin

zaban pe kalma-e-tahrim-e-la-ilah bhi hai

gunah baKHsh de 'anjum' ke ai rahim o karim

ki pur-gunah bhi hai aur uzr-KHwah bhi hai

dikhaega kise mahshar mein apna munh 'anjum'

siyahkar bhi hai aur ru-siyah bhi hai