bazm-e-hasti ki wo faza bhi nahin

bazm-e-hastī kī vo fazā bhī nahīñ

mutrib-e-vaqt ḳhush-navā bhī nahīñ

dil na dhaḌkā ḳhatā huī lekin

terī paa.el kī vo sadā bhī nahīñ

kitnī vīrān hai galī dil kī

duur tak koī naqsh-e-pā bhī nahīñ

kyā musībat hai tere dīvāne

qaid meñ bhī nahīñ rihā bhī nahīñ

vaj.h-e-ārā.ish-e-ḳham-e-kākul

ham nahīñ haiñ to aa.ina bhī nahīñ

ab to sunte haiñ un kī mahfil meñ

jāñ-nisāroñ kā tazkira bhī nahīñ

lutf to ḳhair lutf hai 'nāzim'

mujh pe us shoḳh kī jafā bhī nahīñ

bazm-e-hasti ki wo faza bhi nahin

mutrib-e-waqt KHush-nawa bhi nahin

dil na dhaDka KHata hui lekin

teri pael ki wo sada bhi nahin

kitni viran hai gali dil ki

dur tak koi naqsh-e-pa bhi nahin

kya musibat hai tere diwane

qaid mein bhi nahin riha bhi nahin

wajh-e-araish-e-KHam-e-kakul

hum nahin hain to aaina bhi nahin

ab to sunte hain un ki mahfil mein

jaan-nisaron ka tazkira bhi nahin

lutf to KHair lutf hai 'nazim'

mujh pe us shoKH ki jafa bhi nahin