behtar ki gunjaish baqi rah jati hai

behtar kī gunjā.ish baaqī rah jaatī hai

kamī kahīñ poshīda koī rah jaatī hai

man-chāhī tasvīr banāne meñ mujh se

hunar-varī meñ kuchh kotāhī rah jaatī hai

sailāb aa jaane par us bastī kī

saarī puḳhta-kārī kachchī rah jaatī hai

banñe vaalī baat vahī hotī hai vo jo

bante bante yaksar bantī rah jaatī hai

rah jaatī hai aate aate aatī saa.at

honī hote hote hotī rah jaatī hai

vaqt guzar jaatā hai lekin dil kī ranjish

dil meñ baiThī kī baiThī hī rah jaatī hai

chalte rah jaate haiñ roz o shab ke dhande

gañgā ulTī sīdhī bahtī rah jaatī hai

phāñk liye jaane ko ḳhaak masāfat kī

rāhoñ par hī chhānī-phaTkī rah jaatī hai

aa jaatī hai birhā aur dulhniyāñ chhat par

apne giile baal sukhātī rah jaatī hai

behtar ki gunjaish baqi rah jati hai

kami kahin poshida koi rah jati hai

man-chahi taswir banane mein mujh se

hunar-wari mein kuchh kotahi rah jati hai

sailab aa jaane par us basti ki

sari puKHta-kari kachchi rah jati hai

banne wali baat wahi hoti hai wo jo

bante bante yaksar banti rah jati hai

rah jati hai aate aate aati saat

honi hote hote hoti rah jati hai

waqt guzar jata hai lekin dil ki ranjish

dil mein baiThi ki baiThi hi rah jati hai

chalte rah jate hain roz o shab ke dhande

ganga ulTi sidhi bahti rah jati hai

phank liye jaane ko KHak masafat ki

rahon par hi chhani-phaTki rah jati hai

aa jati hai birha aur dulhniyan chhat par

apne gile baal sukhati rah jati hai