chand lamhon ke liye ek mulaqat rahi

chand lamhoñ ke liye ek mulāqāt rahī

phir na vo tū na vo maiñ aur na vo raat rahī

kurra-e-arz ne dekhā hī na thā vo ḳhurshīd

jis kī gardish meñ shab o roz mirī zaat rahī

ab to har shaḳhs ujāloñ meñ khaḌā hai uryāñ

kaun sī shakl pas-e-parda-e-zulmāt rahī

sard-mehrī mire lahje meñ bhī hogī lekin

tujh meñ ḳhud bhī to na pahlī sī koī baat rahī

hāl-e-dil us ko sunā kar hai bahut ḳhush 'kausar'

lekin ab soch zarā kyā tirī auqāt rahī

chand lamhon ke liye ek mulaqat rahi

phir na wo tu na wo main aur na wo raat rahi

kurra-e-arz ne dekha hi na tha wo KHurshid

jis ki gardish mein shab o roz meri zat rahi

ab to har shaKHs ujalon mein khaDa hai uryan

kaun si shakl pas-e-parda-e-zulmat rahi

sard-mehri mere lahje mein bhi hogi lekin

tujh mein KHud bhi to na pahli si koi baat rahi

haal-e-dil us ko suna kar hai bahut KHush 'kausar'

lekin ab soch zara kya teri auqat rahi