chhaTe ghubar-e-nazar baam-e-tur aa jae

chhaTe ġhubār-e-nazar bām-e-tūr aa jaa.e

piyo sharāb ki chehre pe nuur aa jaa.e

uThāo jaam ba-nām-e-hayāt bāda-kasho

nazāre jhūmeñ nazar ko surūr aa jaa.e

sharāb-ḳhāne meñ kausar kā zikr kyā kahiye

kisī kī aql meñ jaise futūr aa jaa.e

maqām-e-dār se guzro to zindagī paao

piyo jo zahr-e-halāhal surūr aa jaa.e

nigāh tez nafas garm aarzū bebāk

jise ho naaz hamāre huzūr aa jaa.e

ye kārobār-e-mashiyat bhī ḳhuub hai 'tābāñ'

kisī pe barq gire zad pe tuur aa jaa.e

chhaTe ghubar-e-nazar baam-e-tur aa jae

piyo sharab ki chehre pe nur aa jae

uThao jam ba-nam-e-hayat baada-kasho

nazare jhumen nazar ko surur aa jae

sharab-KHane mein kausar ka zikr kya kahiye

kisi ki aql mein jaise futur aa jae

maqam-e-dar se guzro to zindagi pao

piyo jo zahr-e-halahal surur aa jae

nigah tez nafas garm aarzu bebak

jise ho naz hamare huzur aa jae

ye karobar-e-mashiyat bhi KHub hai 'taban'

kisi pe barq gire zad pe tur aa jae