chhup gae sae mein sae main akela rah gaya

chhup ga.e saa.e meñ saa.e maiñ akelā rah gayā

itne gahre abr chhā.e maiñ akelā rah gayā

maiñ akelā rah gayā to maiñ ne kuchh rishte banā.e

maiñ ne kuchh rishte banā.e maiñ akelā rah gayā

halqa-e-ahbāb kī maujūdgī meñ yuuñ huā

ek din baiThe biThā.e maiñ akelā rah gayā

kitnā mushkil hai agar is jiddatoñ ke daur meñ

koī mujh ko DhūñD laa.e maiñ akelā rah gayā

raushnī kī zad meñ hai yā tīrgī kī qaid meñ

tū kahāñ hai mere saa.e maiñ akelā rah gayā

aap se pahle kam-az-kam maiñ to apne paas thā

aap itne paas aa.e maiñ akelā rah gayā

ye gavārā hī nahīñ jo ḳhud akelā ho use

ro ke batlā.ūñ ki haa.e maiñ akelā rah gayā

chhup gae sae mein sae main akela rah gaya

itne gahre abr chhae main akela rah gaya

main akela rah gaya to main ne kuchh rishte banae

main ne kuchh rishte banae main akela rah gaya

halqa-e-ahbab ki maujudgi mein yun hua

ek din baiThe biThae main akela rah gaya

kitna mushkil hai agar is jiddaton ke daur mein

koi mujh ko DhunD lae main akela rah gaya

raushni ki zad mein hai ya tirgi ki qaid mein

tu kahan hai mere sae main akela rah gaya

aap se pahle kam-az-kam main to apne pas tha

aap itne pas aae main akela rah gaya

ye gawara hi nahin jo KHud akela ho use

ro ke batlaun ki hae main akela rah gaya