chilchilati dhup sar par aur tanha aadmi

chilchilātī dhuup sar par aur tanhā aadmī

aah ye ḳhāmosh patthar aur tanhā aadmī

jis tarah ik barf ke Tiile pe jaltī ho chitā

ye pighaltā mom sā ghar aur tanhā aadmī

is hisār-e-ḳhāmushī meñ barsar-e-paikār haiñ

tez āvāzoñ ke lashkar aur tanhā aadmī

kyā usī kā naam hai ra.anā.ī-e-bazm-e-hayāt

tañg kamra sard bistar aur tanhā aadmī

kis tarah ābād hogī dil kī suunī kā.enāt

Dūbte majrūh manzar aur tanhā aadmī

haa.e un be-kār zehnoñ kī ghanī parchhā.iyāñ

uf ye sannāTe kā ajgar aur tanhā aadmī

raat ke nañge badan se ḳhvāhishoñ kī chheḌ-chhāḌ

har-ghaḌī anjām kā Dar aur tanhā aadmī

chilchilati dhup sar par aur tanha aadmi

aah ye KHamosh patthar aur tanha aadmi

jis tarah ek barf ke Tile pe jalti ho chita

ye pighalta mom sa ghar aur tanha aadmi

is hisar-e-KHamushi mein barsar-e-paikar hain

tez aawazon ke lashkar aur tanha aadmi

kya usi ka nam hai ranai-e-bazm-e-hayat

tang kamra sard bistar aur tanha aadmi

kis tarah aabaad hogi dil ki suni kaenat

Dubte majruh manzar aur tanha aadmi

hae un be-kar zehnon ki ghani parchhaiyan

uf ye sannaTe ka ajgar aur tanha aadmi

raat ke nange badan se KHwahishon ki chheD-chhaD

har-ghaDi anjam ka Dar aur tanha aadmi