der tak koi kisi se bad-guman rahta nahin

der tak koī kisī se bad-gumāñ rahtā nahīñ

vo vahāñ aatā to hogā maiñ jahāñ rahtā nahīñ

ek maiñ huuñ dhuup meñ kitnā safar tai kar liyā

ek tū hai jo kabhī be-sā.ebāñ rahtā nahīñ

tum ko kyuuñ peḌoñ pe likkhe naam miTne kā hai dukh

is badaltī rut meñ patthar par nishāñ rahtā nahīñ

vo banā letā hai apnā ghoñsla dīvār meñ

jis parinde kā shajar meñ āshiyāñ rahtā nahīñ

tū parindoñ kī tarah uḌne kī ḳhvāhish chhoḌ de

be-zamīñ logoñ ke sar par āsmāñ rahtā nahīñ

der tak koi kisi se bad-guman rahta nahin

wo wahan aata to hoga main jahan rahta nahin

ek main hun dhup mein kitna safar tai kar liya

ek tu hai jo kabhi be-saeban rahta nahin

tum ko kyun peDon pe likkhe nam miTne ka hai dukh

is badalti rut mein patthar par nishan rahta nahin

wo bana leta hai apna ghonsla diwar mein

jis parinde ka shajar mein aashiyan rahta nahin

tu parindon ki tarah uDne ki KHwahish chhoD de

be-zamin logon ke sar par aasman rahta nahin