dikhā.ī de ki shuā-e-basīr khīñchtā huuñ
ġhubār khīñch jigar kā lakīr khīñchtā huuñ
dikhā.ī detā huuñ tanhā safīne meñ lekin
kināre lagte hī jamm-e-ġhafīr khīñchtā huuñ
mire jilau se koī kahkashāñ nahīñ bachtī
maiñ khīñchne pe jo aa.uuñ aḳhīr khīñchtā huuñ
umaD paḌī hai jo yaksar ḳhizāñ ke dhāre se
gulābī-e-nigah-e-nā-guzīr khīñchtā huuñ
fishār paḌtā hai gahrā koī rag-o-pai meñ
kalī kalī se subū-e-abīr khīñchtā huuñ
ki jaise ḳhud se mulāqāt ho nahīñ paatī
jahāñ se uTThā huā hai ḳhamīr khīñchtā huuñ
hazāroñ aa.ine har lahza ḳhālī hote haiñ
palaT palaT ke vahī aks-e-pīr khīñchtā huuñ
mufāhamat se jo had paar ho to ho jaa.e
bañdhā huā rag-e-jāñ se zamīr khīñchtā huuñ
jin āsmānoñ meñ sayyāl-e-vaqt sākit hai
kamand Daal vahāñ jū-e-shīr khīñchtā huuñ
magar havā-o-havas par hī ḳharch ho jaa.e
har ek jhoñke se bād-e-kasīr khīñchtā huuñ
irāde bhāñp tire jā dhaḌaktā hai dar par
paḌā huā pas-e-zindāñ asiir khīñchtā huuñ
baġhair bhed na an-honī se bachā jaa.e
palaT ke aatā hai aksar jo tiir khīñchtā huuñ
tilism-e-zulf hifāzat kā piñjra ho jaise
maze jahān ke ho kar asiir khīñchtā huuñ
ye dekh kār-e-jahāñ ne na dhajjiyāñ chhoḌīñ
tirī galī kī taraf ab sharīr khīñchtā huuñ
'naved' kar to diyā shahr-e-ā.ina pāmāl
ab andarūnī saf-e-dār-o-gīr khīñchtā huuñ
dikhai de ki shua-e-basir khinchta hun
ghubar khinch jigar ka lakir khinchta hun
dikhai deta hun tanha safine mein lekin
kinare lagte hi jamm-e-ghafir khinchta hun
mere jilau se koi kahkashan nahin bachti
main khinchne pe jo aaun aKHir khinchta hun
umaD paDi hai jo yaksar KHizan ke dhaare se
gulabi-e-nigah-e-na-guzir khinchta hun
fishaar paDta hai gahra koi rag-o-pai mein
kali kali se subu-e-abir khinchta hun
ki jaise KHud se mulaqat ho nahin pati
jahan se uTTha hua hai KHamir khinchta hun
hazaron aaine har lahza KHali hote hain
palaT palaT ke wahi aks-e-pir khinchta hun
mufahamat se jo had par ho to ho jae
bandha hua rag-e-jaan se zamir khinchta hun
jin aasmanon mein sayyal-e-waqt sakit hai
kamand Dal wahan ju-e-shir khinchta hun
magar hawa-o-hawas par hi KHarch ho jae
har ek jhonke se baad-e-kasir khinchta hun
irade bhanp tere ja dhaDakta hai dar par
paDa hua pas-e-zindan asir khinchta hun
baghair bhed na an-honi se bacha jae
palaT ke aata hai aksar jo tir khinchta hun
tilism-e-zulf hifazat ka pinjra ho jaise
maze jahan ke ho kar asir khinchta hun
ye dekh kar-e-jahan ne na dhajjiyan chhoDin
teri gali ki taraf ab sharir khinchta hun
'nawed' kar to diya shahr-e-aina pamal
ab andaruni saf-e-dar-o-gir khinchta hun
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.