dil-KHastagan mein dard ka aazar koi to aae

dil-ḳhastagāñ meñ dard kā aazar koī to aa.e

patthar se mere ḳhvāb kā paikar koī to aa.e

dariyā bhī ho to kaise Dubo deñ zamīn ko

palkoñ ke paar ġham kā samundar koī to aa.e

chaukhaT se haal pūchhā to bāzār se sunā

ik din ġharīb-ḳhāne ke andar koī to aa.e

jo zaḳhm dostoñ ne diye haiñ vo chhup to jaa.eñ

par dushmanoñ kī samt se patthar koī to aa.e

haiñ nauhagar hazār sanā-ḳhvāñ hazār haiñ

mere sivā.e tiir kī zad par koī to aa.e

lākhoñ jab aa ke jā chuke kyā mil gayā miyāñ

ab bhī ye sochte ho payambar koī to aa.e

shikva durust 'qaisī' ke paiham sukūt kā

lekin is anjuman meñ suḳhnavar koī to aa.e

dil-KHastagan mein dard ka aazar koi to aae

patthar se mere KHwab ka paikar koi to aae

dariya bhi ho to kaise Dubo den zamin ko

palkon ke par gham ka samundar koi to aae

chaukhaT se haal puchha to bazar se suna

ek din gharib-KHane ke andar koi to aae

jo zaKHm doston ne diye hain wo chhup to jaen

par dushmanon ki samt se patthar koi to aae

hain nauhagar hazar sana-KHwan hazar hain

mere siwae tir ki zad par koi to aae

lakhon jab aa ke ja chuke kya mil gaya miyan

ab bhi ye sochte ho payambar koi to aae

shikwa durust 'qaisi' ke paiham sukut ka

lekin is anjuman mein suKHnawar koi to aae