dil se nikli hui har aah ki tasir mein aa

dil se niklī huī har aah kī tāsīr meñ aa

maañg le rab se mujhe aur mirī taqdīr meñ aa

rābta mujh se dil-o-jāñ kā agar rakhnā hai

mujh se vābasta kisī halqa-e-zanjīr meñ aa

maiñ banātā huuñ taḳhayyul ke qalam se paikar

merī tahrīr mire dard kī tasvīr meñ aa

ye bhī mumkin hai kasāfat hī diloñ kī dhul jaa.e

merī āñkhoñ se jo bahtā hai isī niir meñ aa

Dhal na jaa.e kahīñ ye husn-e-suḳhan ai 'anvar'

dil ye kahtā hai ki is zulf-e-girah-gīr meñ aa

dil se nikli hui har aah ki tasir mein aa

mang le rab se mujhe aur meri taqdir mein aa

rabta mujh se dil-o-jaan ka agar rakhna hai

mujh se wabasta kisi halqa-e-zanjir mein aa

main banata hun taKHayyul ke qalam se paikar

meri tahrir mere dard ki taswir mein aa

ye bhi mumkin hai kasafat hi dilon ki dhul jae

meri aankhon se jo bahta hai isi nir mein aa

Dhal na jae kahin ye husn-e-suKHan ai 'anwar'

dil ye kahta hai ki is zulf-e-girah-gir mein aa