dosti ka fareb hi khaen

dostī kā fareb hī khā.eñ

aao kāġhaz kī naav tairā.eñ

ham agar rah-ravī kā azm kareñ

manzileñ khiñch ke ḳhud chalī aa.eñ

ham ko āmāda-e-safar na karo

rāste pur-ḳhatar na ho jaa.eñ

ham-safar rah ga.e bahut pīchhe

aao kuchh der ko Thahar jaa.eñ

mutriba aisā giit chheḌ ki ham

zindagī ke qarīb ho jaa.eñ

in bahāroñ kī aabrū rakh lo

muskurāo ki phuul khil jaa.eñ

gesū-e-zīst ke ye uljhāo

aao mil kar 'shakeb' suljhā.eñ

dosti ka fareb hi khaen

aao kaghaz ki naw tairaen

hum agar rah-rawi ka azm karen

manzilen khinch ke KHud chali aaen

hum ko aamada-e-safar na karo

raste pur-KHatar na ho jaen

ham-safar rah gae bahut pichhe

aao kuchh der ko Thahar jaen

mutriba aisa git chheD ki hum

zindagi ke qarib ho jaen

in bahaaron ki aabru rakh lo

muskurao ki phul khil jaen

gesu-e-zist ke ye uljhao

aao mil kar 'shakeb' suljhaen