firaq-e-yar mein kuchh kahiye samjhaya nahin jata

firāq-e-yār meñ kuchh kahiye samjhāyā nahīñ jaatā

dil-e-vahshī kisī sūrat se bahlāyā nahīñ jaatā

hamīñ ne chun liye phūloñ ke badle ḳhaar dāman meñ

faqat gulchīñ ke sar ilzām Thahrāyā nahīñ jaatā

sar-e-bāzār rusvā ho ga.e kyā ham na kahte the

kisī saudā.ī ke muñh is qadar aayā nahīñ jaatā

garebāñ thaam leñge ḳhaar to mushkil bahut hogī

gulāboñ kī ravish par itnā iThlāyā nahīñ jaatā

mahak jā.egī merī ḳhāmushī bhī bū-e-gul ho kar

nidā-e-haq ko qaid-o-band meñ laayā nahīñ jaatā

udhar vo ahd-o-paimān-e-vafā kī baat karte haiñ

idhar mashq-e-sitam bhī tark farmāyā nahīñ jaatā

'anīs' uTTho na.ī fikroñ se rāheñ zau-fishāñ kar lo

ma.āl-e-laġhzish-e-māzī pe pachhtāyā nahīñ jaatā

firaq-e-yar mein kuchh kahiye samjhaya nahin jata

dil-e-wahshi kisi surat se bahlaya nahin jata

hamin ne chun liye phulon ke badle KHar daman mein

faqat gulchin ke sar ilzam Thahraya nahin jata

sar-e-bazar ruswa ho gae kya hum na kahte the

kisi saudai ke munh is qadar aaya nahin jata

gareban tham lenge KHar to mushkil bahut hogi

gulabon ki rawish par itna iThlaya nahin jata

mahak jaegi meri KHamushi bhi bu-e-gul ho kar

nida-e-haq ko qaid-o-band mein laya nahin jata

udhar wo ahd-o-paiman-e-wafa ki baat karte hain

idhar mashq-e-sitam bhi tark farmaya nahin jata

'anis' uTTho nai fikron se rahen zau-fishan kar lo

maal-e-laghzish-e-mazi pe pachhtaya nahin jata