giran guzarne laga daur-e-intizar mujhe

girāñ guzarne lagā daur-e-intizār mujhe

zarā thapak ke sulā de ḳhayāl-e-yār mujhe

na aayā ġham bhī mohabbat meñ sāzgār mujhe

vo ḳhud taḌap ga.e dekhā jo be-qarār mujhe

nigāh-e-sharmagīñ chupke se le uḌī mujh ko

pukārtā hī rahā koī baar baar mujhe

nigāh-e-mast ye meyār-e-be-ḳhudī kyā hai

zamāne vaale samajhte haiñ hoshiyār mujhe

bajā hai tark-e-ta.alluq kā mashvara lekin

na iḳhtiyār unheñ hai na iḳhtiyār mujhe

bahār aur ba-qaid-e-ḳhizāñ hai nañg mujhe

agar mile to mile mustaqil bahār mujhe

giran guzarne laga daur-e-intizar mujhe

zara thapak ke sula de KHayal-e-yar mujhe

na aaya gham bhi mohabbat mein sazgar mujhe

wo KHud taDap gae dekha jo be-qarar mujhe

nigah-e-sharmagin chupke se le uDi mujh ko

pukarta hi raha koi bar bar mujhe

nigah-e-mast ye meyar-e-be-KHudi kya hai

zamane wale samajhte hain hoshiyar mujhe

baja hai tark-e-talluq ka mashwara lekin

na iKHtiyar unhen hai na iKHtiyar mujhe

bahaar aur ba-qaid-e-KHizan hai nang mujhe

agar mile to mile mustaqil bahaar mujhe