guzar chuke hain badan se aage najat ka KHwab hum hue hain

guzar chuke haiñ badan se aage najāt kā ḳhvāb ham hue haiñ

muhīt sāñsoñ ke paar jā kar bahut hī nāyāb ham hue haiñ

kisī ne ham ko atā nahīñ kī hamārī gardish hai apnī gardish

ḳhud apnī marzī se is jahāñ kī ragoñ meñ girdāb ham hue haiñ

ajiib kho.e hue jahānoñ kī guuñj hai apne gumbadoñ meñ

na jaane kis kī samā.atoñ ke mazār kā baab ham hue haiñ

jo ham meñ mismār ho chukā hai usī se tāmīr hai hamārī

adam ke patthar tarāsh kar hī abad kī mehrāb ham hue haiñ

tamām sat.heñ ulaT rahī haiñ hayāt kī maut kī ḳhudā kī

jo tere dil se ubhar ke aate haiñ aise sailāb ham hue haiñ

'riyāz' Dar hai kahīñ na āñkhoñ kī kashtiyoñ meñ chhupe samundar

jumūd TuuTā hai saarī maujoñ kā aise be-tāb ham hue haiñ

guzar chuke hain badan se aage najat ka KHwab hum hue hain

muhit sanson ke par ja kar bahut hi nayab hum hue hain

kisi ne hum ko ata nahin ki hamari gardish hai apni gardish

KHud apni marzi se is jahan ki ragon mein girdab hum hue hain

ajib khoe hue jahanon ki gunj hai apne gumbadon mein

na jaane kis ki samaaton ke mazar ka bab hum hue hain

jo hum mein mismar ho chuka hai usi se tamir hai hamari

adam ke patthar tarash kar hi abad ki mehrab hum hue hain

tamam sathen ulaT rahi hain hayat ki maut ki KHuda ki

jo tere dil se ubhar ke aate hain aise sailab hum hue hain

'riyaz' Dar hai kahin na aankhon ki kashtiyon mein chhupe samundar

jumud TuTa hai sari maujon ka aise be-tab hum hue hain