guzishta raat koi chand ghar mein utra tha

guzishta raat koī chāñd ghar meñ utrā thā

vo ek ḳhvāb thā yā bas nazar kā dhokā thā

sitāre os mire saath sub.h tak ro.e

magar vo shaḳhs to patthar kā jaise turshā thā

bichhaḌte vaqt anā darmiyān thī varna

manānā donoñ ne ik dūsre ko chāhā thā

qarīb aa ke bhī ḳhvāboñ kī kho ga.iiñ kirneñ

ki mujh se aage mirā bad-nasīb saaya thā

gila nahīñ hai jo us ne mujhe na pahchānā

lahū-luhān mirī zindagī kā chehra thā

nigal sakā na shab-e-ġham kā azhdahā mujh ko

ufuq pe vaqt-e-sahar āftāb ubhrā thā

hasīn chāñd ke chehre pe paḌ ga.e dhabbe

ki mere dil ke añdhere se ye bhī guzrā thā

guzishta raat koi chand ghar mein utra tha

wo ek KHwab tha ya bas nazar ka dhoka tha

sitare os mere sath subh tak roe

magar wo shaKHs to patthar ka jaise tursha tha

bichhaDte waqt ana darmiyan thi warna

manana donon ne ek dusre ko chaha tha

qarib aa ke bhi KHwabon ki kho gain kirnen

ki mujh se aage mera bad-nasib saya tha

gila nahin hai jo us ne mujhe na pahchana

lahu-luhan meri zindagi ka chehra tha

nigal saka na shab-e-gham ka azhdaha mujh ko

ufuq pe waqt-e-sahar aaftab ubhra tha

hasin chand ke chehre pe paD gae dhabbe

ki mere dil ke andhere se ye bhi guzra tha