humne to be-shumar bahane banae hain

ham ne to be-shumār bahāne banā.e haiñ

kahtā hai dil ki but bhī ḳhudā ne banā.e haiñ

le le ke terā naam in āñkhoñ ne raat bhar

tasbīh-e-intizār ke daane banā.e haiñ

ham ne tumhāre ġham ko haqīqat banā diyā

tum ne hamāre ġham ke fasāne banā.e haiñ

vo log mutma.in haiñ ki patthar haiñ un ke paas

ham ḳhush ki ham ne ā.īna-ḳhāne banā.e haiñ

bhañvre unhī pe chal ke kareñge tavāf-e-gul

jo dā.ere chaman meñ sabā ne banā.e haiñ

ham to vahāñ pahuñch nahīñ sakte tamām umr

āñkhoñ ne itnī duur Thikāne banā.e haiñ

aaj us badan pe bhī nazar aa.e talab ke daaġh

dīvār par bhī naqsh vafā ne banā.e haiñ

hum ne to be-shumar bahane banae hain

kahta hai dil ki but bhi KHuda ne banae hain

le le ke tera nam in aankhon ne raat bhar

tasbih-e-intizar ke dane banae hain

hum ne tumhaare gham ko haqiqat bana diya

tum ne hamare gham ke fasane banae hain

wo log mutmain hain ki patthar hain un ke pas

hum KHush ki hum ne aaina-KHane banae hain

bhanwre unhi pe chal ke karenge tawaf-e-gul

jo daere chaman mein saba ne banae hain

hum to wahan pahunch nahin sakte tamam umr

aankhon ne itni dur Thikane banae hain

aaj us badan pe bhi nazar aae talab ke dagh

diwar par bhi naqsh wafa ne banae hain