hanste hue chehre mein koi sham chhupi thi

hañste hue chehre meñ koī shaam chhupī thī

ḳhush-lahja taḳhātub kī khanak niim chaḌhī thī

jalvoñ kī anā toḌ ga.ī ek hī pal meñ

kachnār sī bijlī mere siine meñ uḌī thī

piitā rahā dariyā ke tamavvuj ko shanāvar

hoñToñ pe nadī ke bhī ajab tishna-labī thī

ḳhush-rañg ma.ānī ke ta.āqub meñ rahā maiñ

ḳhatt-e-lab-e-lālīñ kī har ik mauj ḳhafī thī

har samt ram-e-haft balā shola-fishāñ hai

bachpan meñ to har gaam pe ik sabz-parī thī

sadiyoñ se hai jalte hue Taapu kī amānat

vo vādi-o-gul-rañg jo ḳhvāboñ meñ palī thī

jalte hue kohsār pe ik shoḳh gilahrī

muñh moḌ ke gulshan se ba-sad naaz khaḌī thī

neze kī anī thī rag-e-anfās meñ raqsāñ

vo taaza havāoñ meñ thā khiḌkī bhī khulī thī

ham pī bhī ga.e aur salāmat bhī haiñ 'amabar'

paanī kī har ik buuñd meñ hiire kī kanī thī

hanste hue chehre mein koi sham chhupi thi

KHush-lahja taKHatub ki khanak nim chaDhi thi

jalwon ki ana toD gai ek hi pal mein

kachnar si bijli mere sine mein uDi thi

pita raha dariya ke tamawwuj ko shanawar

honTon pe nadi ke bhi ajab tishna-labi thi

KHush-rang maani ke taaqub mein raha main

KHatt-e-lab-e-lalin ki har ek mauj KHafi thi

har samt ram-e-haft bala shola-fishan hai

bachpan mein to har gam pe ek sabz-pari thi

sadiyon se hai jalte hue Tapu ki amanat

wo wadi-o-gul-rang jo KHwabon mein pali thi

jalte hue kohsar pe ek shoKH gilahri

munh moD ke gulshan se ba-sad naz khaDi thi

neze ki ani thi rag-e-anfas mein raqsan

wo taza hawaon mein tha khiDki bhi khuli thi

hum pi bhi gae aur salamat bhi hain 'amabar'

pani ki har ek bund mein hire ki kani thi