har moD pe safar tha ajab bolne na pae

har moḌ pe safar thā ajab bolne na paa.e

manzil milī jo dard kī lab bolne na paa.e

likhvā diye haiñ auroñ ne dīvār-o-dar pe naam

ik ham the apnā nām-o-nasab bolne na paa.e

ghar jal rahā thā sab ke laboñ par dhuāñ sā thā

kis kis pe kyā huā thā ġhazab bolne na paa.e

sapnoñ kī garm chādareñ oḌhe hue the log

utrī thī dhuup shahr meñ kab bolne na paa.e

ham bolte rahe haiñ lab-e-fikr se 'sabā'

kuchh log apne-āp se jab bolne na paa.e

har moD pe safar tha ajab bolne na pae

manzil mili jo dard ki lab bolne na pae

likhwa diye hain auron ne diwar-o-dar pe nam

ek hum the apna nam-o-nasab bolne na pae

ghar jal raha tha sab ke labon par dhuan sa tha

kis kis pe kya hua tha ghazab bolne na pae

sapnon ki garm chadaren oDhe hue the log

utri thi dhup shahr mein kab bolne na pae

hum bolte rahe hain lab-e-fikr se 'saba'

kuchh log apne-ap se jab bolne na pae