har pari-wash ka eatibar karo

har parī-vash kā e.atibār karo

zindagī sirf intizār karo

ham se nafrat karo ki pyaar karo

koī rishta to ustuvār karo

ham haiñ lazzat-kash-e-gunāh-e-vafā

dosto ham ko sañgsār karo

zindagī ho ki mai ki sachchā.ī

talḳh jo shai ho us se pyaar karo

har janam par ba-yād-e-sarv-qadāñ

jaañ supurd-e-farāz-e-dār karo

apne dāman kī chand kaliyoñ se

tum na andāza-e-bahār karo

gul ke mānind chaak chaak ho dil

itnā shā.ista-e-bahār karo

ham-safar jab bhī ho nigār-e-ġhazal

ravish-e-ḳhās iḳhtiyār karo

har pari-wash ka eatibar karo

zindagi sirf intizar karo

hum se nafrat karo ki pyar karo

koi rishta to ustuwar karo

hum hain lazzat-kash-e-gunah-e-wafa

dosto hum ko sangsar karo

zindagi ho ki mai ki sachchai

talKH jo shai ho us se pyar karo

har janam par ba-yaad-e-sarw-qadan

jaan supurd-e-faraaz-e-dar karo

apne daman ki chand kaliyon se

tum na andaza-e-bahaar karo

gul ke manind chaak chaak ho dil

itna shaista-e-bahaar karo

ham-safar jab bhi ho nigar-e-ghazal

rawish-e-KHas iKHtiyar karo