har tamanna dil se ruKHsat ho gai

har tamannā dil se ruḳhsat ho ga.ī

ab to aa jā ab to ḳhalvat ho ga.ī

vo riyā jis par the zāhid ta.ana-zan

pahle aadat phir ibādat ho ga.ī

jī rahā huuñ maut kī ummīd meñ

mar hī jā.ūñgā jo sehhat ho ga.ī

laakh jhiḌko ab nahīñ phirtā hai dil

ho ga.ī ab to mohabbat ho ga.ī

mana'-e-shai vaa.iz hai vaj.h-e-hirs-e-shai

ab to mai se aur raġhbat ho ga.ī

yā to masjid rāt-din yā mai-kada

kyā se kyā allāh hālat ho ga.ī

kar chuke rindī bas ab 'majzūb' tum

ek chullū meñ ye hālat ho ga.ī

har tamanna dil se ruKHsat ho gai

ab to aa ja ab to KHalwat ho gai

wo riya jis par the zahid tana-zan

pahle aadat phir ibaadat ho gai

ji raha hun maut ki ummid mein

mar hi jaunga jo sehhat ho gai

lakh jhiDko ab nahin phirta hai dil

ho gai ab to mohabbat ho gai

mana'-e-shai waiz hai wajh-e-hirs-e-shai

ab to mai se aur raghbat ho gai

ya to masjid raat-din ya mai-kada

kya se kya allah haalat ho gai

kar chuke rindi bas ab 'majzub' tum

ek chullu mein ye haalat ho gai