hawa ke zor se jab baadban phaTne lage

havā ke zor se jab bādbān phaTne lage

musāfir apne ḳhudāoñ ke naam raTne lage

hamāre sīnoñ pe ab bhī bahut jagah hai janāb

magar tumhāre hī tarkash meñ tiir ghaTne lage

yazīd-e-vaqt huā jis ghaḌī se taḳht-nashīñ

hamāre naam ke ḳhanjar har ik meñ baTne lage

makān ham ne banā to liyā kināre par

na aisā ho ke kināre kī ret kaTne lage

tumhārī ḳhushiyāñ bhī merī haiñ ġham bhī mere haiñ

ye māl-e-muft nahīñ jo har ik jhapaTne lage

ise charāġh kā rutba kahūñ yā ro.ab kahūñ

havā ke par mirī dahlīz par simaTne lage

ye kis ne pheñkā hai patthar dhadhakte sho.aloñ par

sharāre ho ke judā aag se uchaTne lage

bahut thā zo.am jinheñ apnī shah-savārī par

gire kuchh aise ke siine ke bal ghisaTne lage

tere mahal ke hisāroñ kī iiñT jhaḌne lagīñ

na aisā ho terā shāhī vaqār ghaTne lage

hue haiñ shahr-badar ham magar ḳhudā na kare

makān dhañsne lageñ aur zamīñ palaTne lage

'navāz' ham hī the jo rāsta nahīñ badla

vo zalzale the ke dariyā bhī rah se ha.Tne lage

hawa ke zor se jab baadban phaTne lage

musafir apne KHudaon ke nam raTne lage

hamare sinon pe ab bhi bahut jagah hai janab

magar tumhaare hi tarkash mein tir ghaTne lage

yazid-e-waqt hua jis ghaDi se taKHt-nashin

hamare nam ke KHanjar har ek mein baTne lage

makan hum ne bana to liya kinare par

na aisa ho ke kinare ki ret kaTne lage

tumhaari KHushiyan bhi meri hain gham bhi mere hain

ye mal-e-muft nahin jo har ek jhapaTne lage

ise charagh ka rutba kahun ya roab kahun

hawa ke par meri dahliz par simaTne lage

ye kis ne phenka hai patthar dhadhakte shoalon par

sharare ho ke juda aag se uchaTne lage

bahut tha zoam jinhen apni shah-sawari par

gire kuchh aise ke sine ke bal ghisaTne lage

tere mahal ke hisaron ki inT jhaDne lagin

na aisa ho tera shahi waqar ghaTne lage

hue hain shahr-badar hum magar KHuda na kare

makan dhansne lagen aur zamin palaTne lage

'nawaz' hum hi the jo rasta nahin badla

wo zalzale the ke dariya bhi rah se haTne lage