in andheron se pare is shab-e-gham se aage

in añdheroñ se pare is shab-e-ġham se aage

ik na.ī sub.h bhī hai shām-e-alam se aage

dasht meñ kis se kareñ ābla-pā.ī kā gilā

rahnumā koī nahīñ naqsh-e-qadam se aage

saaz meñ kho.e rahe soz na samjhā koī

dard kī Tiis thī pāzeb kī chham se aage

ai ḳhoshā azm-e-javāñ zauq-e-safar josh-e-talab

hādse baḌh na sake apne qadam se aage

yaad hai lazzat-e-āzār-e-mohabbat ab tak

dil ko miltā thā sukūñ mashq-e-sitam se aage

surḳh-rū hai jahāñ tārīḳh-e-do-ālam 'ishrat'

ḳhuun Tapkā hai vahīñ nok-e-qalam se aage

in andheron se pare is shab-e-gham se aage

ek nai subh bhi hai sham-e-alam se aage

dasht mein kis se karen aabla-pai ka gila

rahnuma koi nahin naqsh-e-qadam se aage

saz mein khoe rahe soz na samjha koi

dard ki Tis thi pazeb ki chham se aage

ai KHosha azm-e-jawan zauq-e-safar josh-e-talab

hadse baDh na sake apne qadam se aage

yaad hai lazzat-e-azar-e-mohabbat ab tak

dil ko milta tha sukun mashq-e-sitam se aage

surKH-ru hai jahan tariKH-e-do-alam 'ishrat'

KHun Tapka hai wahin nok-e-qalam se aage