jo chala gaya so chala gaya jo hai pas us ka KHayal rakh

jo chalā gayā so chalā gayā jo hai paas us kā ḳhayāl rakh

jo luTā diyā use bhuul jā jo bachā hai us ko sambhāl rakh

kabhī sar meñ saudā samā koī kabhī regzār meñ raqs kar

kabhī zaḳhm bāñdh ke paañv meñ kahīñ surḳh surḳh dhamāl rakh

jo churā.ī hai shab-e-tār se ka.ī ratjagoñ ko guzār ke

vahī kājaloñ kī lakīr hai apnī aañkh meñ Daal Daal rakh

kisī taara taara firāq se koī guftugū koī baat kar

ye javāb-gāh-e-shu.ūr hai koī apne paas savāl rakh

tire dard saare girāñ-bahā tirī vahshateñ haiñ azīm-tar

vahī baal khol ke bain kar vahī shām-e-sahn-e-malāl rakh

jahāñ laġhzishoñ se mafar nahīñ ye vo āgahī kā maqām hai

yahāñ hast-o-būd ko bhuul jā na.ī qurbatoñ se visāl rakh

ye jo raushnī kā hai dā.era ye rahīn-e-shams-o-qamar nahīñ

tire bas meñ kab thā ki ab rahe tū uruuj rakh yā zavāl rakh

jo chala gaya so chala gaya jo hai pas us ka KHayal rakh

jo luTa diya use bhul ja jo bacha hai us ko sambhaal rakh

kabhi sar mein sauda sama koi kabhi regzar mein raqs kar

kabhi zaKHm bandh ke panw mein kahin surKH surKH dhamal rakh

jo churai hai shab-e-tar se kai ratjagon ko guzar ke

wahi kajalon ki lakir hai apni aankh mein Dal Dal rakh

kisi tara tara firaq se koi guftugu koi baat kar

ye jawab-gah-e-shuur hai koi apne pas sawal rakh

tere dard sare giran-baha teri wahshaten hain azim-tar

wahi baal khol ke bain kar wahi sham-e-sahn-e-malal rakh

jahan laghzishon se mafar nahin ye wo aagahi ka maqam hai

yahan hast-o-bud ko bhul ja nai qurbaton se visal rakh

ye jo raushni ka hai daera ye rahin-e-shams-o-qamar nahin

tere bas mein kab tha ki ab rahe tu uruj rakh ya zawal rakh