jo sare ham-safar ek bar harz-e-jaan kar len

jo saare ham-safar ik baar harz-e-jāñ kar leñ

to jis zamīñ pe qadam rakkheñ āsmāñ kar leñ

ishāra kartī haiñ maujeñ ki aa.egā tūfāñ

chalo ham apne irādoñ ko bādbāñ kar leñ

paroñ ko joḌ ke uḌne kā shauq hai jin ko

unheñ batāo ki mahfūz āshiyāñ kar leñ

jo qatl tū ne kiyā thā banā ke mansūba

tire sitam ko baḌhā.eñ to dāstāñ kar leñ

dahakte sho.aloñ pe chalne kā shauq hai jin ko

rutoñ kī aag meñ vo hausle javāñ kar leñ

ye un se kah do agar imtihān kī zid hai

samundaroñ kī tarah dil ko be-karāñ kar leñ

har ek buuñd kā leñge hisāb ham 'alvī'

hamāre ḳhuun se dil ko vo shādmāñ kar leñ

jo sare ham-safar ek bar harz-e-jaan kar len

to jis zamin pe qadam rakkhen aasman kar len

ishaara karti hain maujen ki aaega tufan

chalo hum apne iradon ko baadban kar len

paron ko joD ke uDne ka shauq hai jin ko

unhen batao ki mahfuz aashiyan kar len

jo qatl tu ne kiya tha bana ke mansuba

tere sitam ko baDhaen to dastan kar len

dahakte shoalon pe chalne ka shauq hai jin ko

ruton ki aag mein wo hausle jawan kar len

ye un se kah do agar imtihan ki zid hai

samundaron ki tarah dil ko be-karan kar len

har ek bund ka lenge hisab hum 'alwi'

hamare KHun se dil ko wo shadman kar len