kar-e-hunar sanwarne walon mein aaega

kār-e-hunar sañvārne vāloñ meñ aa.egā

jab bhī hamārā naam havāloñ meñ aa.egā

Tīloñ ko saath le ke jo uḌtī rahī havā

sahrā kā rañg barf ke gāloñ meñ aa.egā

jab āftāb-e-umr kī Dhalne lagegī dhuup

tab raushnī kā fan mire bāloñ meñ aa.egā

kaisā firāq kaisī judā.ī kahāñ kā hijr

vo jā.egā agar to ḳhayāloñ meñ aa.egā

insāñ se pyaar husn-parastī vatan se ishq

ham ne kiyā hai yuuñ ki misāloñ meñ aa.egā

'anjum'-ḳhalīq ik na.e anjum ko dekhnā

jis din vo āgahī ke ujāloñ meñ aa.egā

kar-e-hunar sanwarne walon mein aaega

jab bhi hamara nam hawalon mein aaega

Tilon ko sath le ke jo uDti rahi hawa

sahra ka rang barf ke galon mein aaega

jab aaftab-e-umr ki Dhalne lagegi dhup

tab raushni ka fan mere baalon mein aaega

kaisa firaq kaisi judai kahan ka hijr

wo jaega agar to KHayalon mein aaega

insan se pyar husn-parasti watan se ishq

hum ne kiya hai yun ki misalon mein aaega

'anjum'-KHaliq ek nae anjum ko dekhna

jis din wo aagahi ke ujalon mein aaega