kabhi talash na zae na raegan hogi

kabhī talāsh na zaa.e na rā.egāñ hogī

agar huī bhī to az-rāh-e-imtihāñ hogī

agar mumāniyat-e-sair-e-gulistāñ hogī

to phir bahār hameñ rū-kash-e-ḳhizāñ hogī

usuul ye to nahīñ hai ki nā-murād raheñ

fazā kabhī na kabhī ham pe mehrbāñ hogī

jahān-e-dard meñ insāniyat ke naate se

koī bayān kare merī dāstāñ hogī

mai-e-nashāt-o-tarab jis kā ham se va.ada thā

jabhī huī na farāham to ab kahāñ hogī

bayān-e-ġham to bahut sahl hai pa lazzat-e-ġham

sivā-e-ijz-e-bayāñ kis tarah bayāñ hogī

agar ġhalat hai jo kuchh us ne mujh se aa ke kahā

to ye jasārat-e-tahrīf-e-rāzdāñ hogī

pata chalā ki basārat-fareb haiñ jalve

maiñ is ḳhayāl meñ thā aql pāsbāñ hogī

vahāñ vahāñ ġham-e-hālāt raushnī deñge

mirī ġhazal kī rasā.ī jahāñ jahāñ hogī

piyo piyo ki subūhī se fāsla na rahe

numūd-e-sub.h kī taqrīb meñ azaañ hogī

nashemanoñ kī muḳhālif na thī bahār-e-chaman

magar sharārat-e-īmā-e-bāġhbāñ hogī

to kyā kasāfat-e-uryāni-e-ġhazal ai 'shād'

adab kī ḳhaak uḌāne se kuchh ayaañ hogī

kabhi talash na zae na raegan hogi

agar hui bhi to az-rah-e-imtihan hogi

agar mumaniyat-e-sair-e-gulistan hogi

to phir bahaar hamein ru-kash-e-KHizan hogi

usul ye to nahin hai ki na-murad rahen

faza kabhi na kabhi hum pe mehrban hogi

jahan-e-dard mein insaniyat ke nate se

koi bayan kare meri dastan hogi

mai-e-nashat-o-tarab jis ka hum se wada tha

jabhi hui na faraham to ab kahan hogi

bayan-e-gham to bahut sahl hai pa lazzat-e-gham

siwa-e-ijz-e-bayan kis tarah bayan hogi

agar ghalat hai jo kuchh us ne mujh se aa ke kaha

to ye jasarat-e-tahrif-e-raazdan hogi

pata chala ki basarat-fareb hain jalwe

main is KHayal mein tha aql pasban hogi

wahan wahan gham-e-haalat raushni denge

meri ghazal ki rasai jahan jahan hogi

piyo piyo ki subuhi se fasla na rahe

numud-e-subh ki taqrib mein azan hogi

nashemanon ki muKHalif na thi bahaar-e-chaman

magar shararat-e-ima-e-baghban hogi

to kya kasafat-e-uryani-e-ghazal ai 'shad'

adab ki KHak uDane se kuchh ayan hogi