kahte hain azal jis ko us se bhi kahin pahle

kahte haiñ azal jis ko us se bhī kahīñ pahle

īmān mohabbat par laa.e the hamīñ pahle

asrār-e-ḳhud-āgāhī dīvāne samajhte haiñ

takmīl-e-junūñ āḳhir merāj-e-yaqīñ pahle

chamkā diyā sajdoñ ne naqsh-e-kaf-e-pā lekin

raushan to na thī itnī ye merī jabīñ pahle

har baar ye rah rah kar hotā hai gumāñ mujh ko

shāyad tire jalvoñ ko dekhā thā kahīñ pahle

ye baat alag Thahrī ab ham ko na pahchāneñ

mahfil meñ magar un kī aa.e the hamīñ pahle

ye rāz-e-mohabbat hai samjhegā zamāna kyā

tum hāsil-e-dīñ āḳhir ġhārat-gar-e-dīñ pahle

is kār-e-numāyāñ ke shāhid haiñ chaman vaale

gulshan meñ bahāroñ ko laa.e the hamīñ pahle

taqdīr kī muḳhtārī 'unvān' musallam hai

hotī hai mohabbat bhī majbūr yahīñ pahle

kahte hain azal jis ko us se bhi kahin pahle

iman mohabbat par lae the hamin pahle

asrar-e-KHud-agahi diwane samajhte hain

takmil-e-junun aaKHir meraj-e-yaqin pahle

chamka diya sajdon ne naqsh-e-kaf-e-pa lekin

raushan to na thi itni ye meri jabin pahle

har bar ye rah rah kar hota hai guman mujh ko

shayad tere jalwon ko dekha tha kahin pahle

ye baat alag Thahri ab hum ko na pahchanen

mahfil mein magar un ki aae the hamin pahle

ye raaz-e-mohabbat hai samjhega zamana kya

tum hasil-e-din aaKHir ghaarat-gar-e-din pahle

is kar-e-numayan ke shahid hain chaman wale

gulshan mein bahaaron ko lae the hamin pahle

taqdir ki muKHtari 'unwan' musallam hai

hoti hai mohabbat bhi majbur yahin pahle