kam-zarf ehtiyat ki manzil se aae hain

kam-zarf ehtiyāt kī manzil se aa.e haiñ

ham zindagī ke jāda-e-mushkil se aa.e haiñ

girdāb mahv-e-raqs hai tūfān mahv-e-josh

kuchh log shauq-e-mauj meñ sāhil se aa.e haiñ

ye vaz-e-zabt-e-shauq ki dil jal bujhā magar

shikve zabāñ pe aaj bhī mushkil se aa.e haiñ

āñkhoñ kā soz dil kī kasak to na.iiñ milī

maanā ki aap bhī usī mahfil se aa.e haiñ

ye qashqa-e-ḳhulūs hai zaḳhm-e-jabīñ nahīñ

har chand ham bhī kūcha-e-qātil se aa.e haiñ

dil kā lahū nigāh se Tapkā hai bār-hā

ham rāh-e-ġham meñ aisī bhī manzil se aa.e haiñ

dil ik udaas sub.h nazar ik udaas shaam

kaise kaheñ ki dost kī mahfil se aa.e haiñ

chheḌā thā nok-e-ḳhār ne lekin gumāñ huā

taaza payām parda-e-mahmil se aa.e haiñ

haañ gaa.e jā muġhanni-e-bazm-e-tarab ki aaj

naġhme tirī zabāñ pe mire dil se aa.e haiñ

kam-zarf ehtiyat ki manzil se aae hain

hum zindagi ke jada-e-mushkil se aae hain

girdab mahw-e-raqs hai tufan mahw-e-josh

kuchh log shauq-e-mauj mein sahil se aae hain

ye waz-e-zabt-e-shauq ki dil jal bujha magar

shikwe zaban pe aaj bhi mushkil se aae hain

aankhon ka soz dil ki kasak to nain mili

mana ki aap bhi usi mahfil se aae hain

ye qashqa-e-KHulus hai zaKHm-e-jabin nahin

har chand hum bhi kucha-e-qatil se aae hain

dil ka lahu nigah se Tapka hai bar-ha

hum rah-e-gham mein aisi bhi manzil se aae hain

dil ek udas subh nazar ek udas sham

kaise kahen ki dost ki mahfil se aae hain

chheDa tha nok-e-KHar ne lekin guman hua

taza payam parda-e-mahmil se aae hain

han gae ja mughanni-e-bazm-e-tarab ki aaj

naghme teri zaban pe mere dil se aae hain