KHayal-o-KHwab se ghar kab talak sajaen hum

ḳhayāl-o-ḳhvāb se ghar kab talak sajā.eñ ham

hai jī meñ ab to ki jī ḳhud se bhī uThā.eñ ham

'ajīb vahshateñ hisse meñ apne aa.ī haiñ

ki tere ghar bhī pahuñch kar sakūñ na paa.eñ ham

anīs-e-jāñ to haiñ ye ḳhush-qadāñ chinār magar

adā.eñ terī unheñ kis tarah sikhā.eñ ham

vo ghar to jal bhī chukā jis meñ tum hī tum the kabhī

ab us kī raakh se duniyā na.ī basā.eñ ham

sunā rahe haiñ dukhoñ kī kahāniyāñ kab se

bas ab to dhyān kī naddī meñ Duub jaa.eñ ham

har ek samt pahāḌoñ kā silsila hai yahāñ

hamārā haal hai kyā ye kise sunā.eñ ham

KHayal-o-KHwab se ghar kab talak sajaen hum

hai ji mein ab to ki ji KHud se bhi uThaen hum

'ajib wahshaten hisse mein apne aai hain

ki tere ghar bhi pahunch kar sakun na paen hum

anis-e-jaan to hain ye KHush-qadan chinar magar

adaen teri unhen kis tarah sikhaen hum

wo ghar to jal bhi chuka jis mein tum hi tum the kabhi

ab us ki rakh se duniya nai basaen hum

suna rahe hain dukhon ki kahaniyan kab se

bas ab to dhyan ki naddi mein Dub jaen hum

har ek samt pahaDon ka silsila hai yahan

hamara haal hai kya ye kise sunaen hum