koi to tark-e-marasim pe wasta rah jae

koī to tark-e-marāsim pe vāsta rah jaa.e

vo ham-navā na rahe sūrat-āshnā rah jaa.e

ajab nahīñ ki mirā bojh bhī na mujh se uThe

jahāñ paḌā hai zar-e-jāñ vahīñ paḌā rah jaa.e

maiñ sochtā huuñ mujhe intizār kis kā hai

kivāḌ raat ko ghar kā agar khulā rah jaa.e

kise ḳhabar ki isī farsh-e-sañg par so jā.ūñ

mire makān meñ bistar mirā bichhā rah jaa.e

'zafar' hai behtarī is meñ ki maiñ ḳhamosh rahūñ

khule zabān to izzat kisī kī kyā rah jaa.e

koi to tark-e-marasim pe wasta rah jae

wo ham-nawa na rahe surat-ashna rah jae

ajab nahin ki mera bojh bhi na mujh se uThe

jahan paDa hai zar-e-jaan wahin paDa rah jae

main sochta hun mujhe intizar kis ka hai

kiwaD raat ko ghar ka agar khula rah jae

kise KHabar ki isi farsh-e-sang par so jaun

mere makan mein bistar mera bichha rah jae

'zafar' hai behtari is mein ki main KHamosh rahun

khule zaban to izzat kisi ki kya rah jae