kuchh bhi kaho sab apni anaon pe aDe hain

kuchh bhī kaho sab apnī anāoñ pe aḌe haiñ

sab log yahāñ sūrat-e-asnām khaḌe haiñ

jo paar utartā gayā hotā gayā kam-tar

ham dūri-e-manzil ke tufail aaj baḌe haiñ

ham ko na kaho qāne-e-hālāt ki ham log

zindānī-e-dahlīz ke mansab pe khaḌe haiñ

ai vasl-nasībo! hameñ muḌ kar bhī na dekhā

ham qufl ke mānind masā.ib pe paḌe haiñ

tārīḳh-e-zamīñ baḳht-kushā hone lagī to

khultā gayā ham vaqt se be-kār laḌe haiñ

ujlat ke alaav meñ kiye faisle 'ābid'

ab soch kī barfānī khaḌā.ūñ pe khaḌe haiñ

kuchh bhi kaho sab apni anaon pe aDe hain

sab log yahan surat-e-asnam khaDe hain

jo par utarta gaya hota gaya kam-tar

hum duri-e-manzil ke tufail aaj baDe hain

hum ko na kaho qane-e-haalat ki hum log

zindani-e-dahliz ke mansab pe khaDe hain

ai wasl-nasibo! hamein muD kar bhi na dekha

hum qufl ke manind masaib pe paDe hain

tariKH-e-zamin baKHt-kusha hone lagi to

khulta gaya hum waqt se be-kar laDe hain

ujlat ke alaw mein kiye faisle 'abid'

ab soch ki barfani khaDaun pe khaDe hain