laega rang zabt-e-fughan dekhte raho

lā.egā rañg zabt-e-fuġhāñ dekhte raho

phūTegī har kalī meñ zabāñ dekhte raho

barpā sar-e-hayāt hai ik hashr-e-dār-o-gīr

detā hai kaun kis ko amaañ dekhte raho

dam-bhar ko āstān-e-tamannā pe hai hujūm

jaa.e bichhaḌ ke kaun kahāñ dekhte raho

milne ko hai ḳhamoshi-e-ahl-e-junūñ kī daad

uThne ko hai zamīñ se dhuāñ dekhte raho

mahfil meñ un kī sham.a jalī hai ki jān-o-dil

khultā hai kab ye rāz-e-nihāñ dekhte raho

hai barg-e-gul ko bārish-e-miqrāz ke payām

tarz-e-tapāk-e-ahl-e-jahāñ dekhte raho

aa.ī nigār-e-ġham kī sadā 'hosh' ham chale

tum imtiyāz-e-sūd-o-ziyāñ dekhte raho

laega rang zabt-e-fughan dekhte raho

phuTegi har kali mein zaban dekhte raho

barpa sar-e-hayat hai ek hashr-e-dar-o-gir

deta hai kaun kis ko aman dekhte raho

dam-bhar ko aastan-e-tamanna pe hai hujum

jae bichhaD ke kaun kahan dekhte raho

milne ko hai KHamoshi-e-ahl-e-junun ki dad

uThne ko hai zamin se dhuan dekhte raho

mahfil mein un ki shama jali hai ki jaan-o-dil

khulta hai kab ye raaz-e-nihan dekhte raho

hai barg-e-gul ko barish-e-miqraaz ke payam

tarz-e-tapak-e-ahl-e-jahan dekhte raho

aai nigar-e-gham ki sada 'hosh' hum chale

tum imtiyaz-e-sud-o-ziyan dekhte raho