main aksar sochti hun zindagi ko kaun likkhega

maiñ aksar sochtī huuñ zindagī ko kaun likkhegā

na maiñ likkhūñ to phir is bebasī ko kaun likkhegā

bahut masrūf haiñ ahl-e-jahāñ harza-sarā.ī meñ

ab āshob-e-suḳhan meñ be-hisī ko kaun likkhegā

ka.ī sadiyāñ guzārīñ manziloñ ke khoj meñ phirte

to phir mere sivā is gumrahī ko kaun likkhegā

ham is shahr-e-jafā-pesha se kuchh ummīd kyā rakkheñ

yahāñ is hāv-hū meñ ḳhāmushī ko kaun likkhegā

use fursat nahīñ sāhil, samundar, mauj likhne se

pareshāñ huuñ mirī tishna-labī ko kaun likkhegā

'hijāb' is shahr-e-nā-pursāñ meñ sab jhagḌā anā kā hai

surūr-e-ḳhud-parastī meñ ḳhudī ko kaun likkhegā

main aksar sochti hun zindagi ko kaun likkhega

na main likkhun to phir is bebasi ko kaun likkhega

bahut masruf hain ahl-e-jahan harza-sarai mein

ab aashob-e-suKHan mein be-hisi ko kaun likkhega

kai sadiyan guzarin manzilon ke khoj mein phirte

to phir mere siwa is gumrahi ko kaun likkhega

hum is shahr-e-jafa-pesha se kuchh ummid kya rakkhen

yahan is haw-hu mein KHamushi ko kaun likkhega

use fursat nahin sahil, samundar, mauj likhne se

pareshan hun meri tishna-labi ko kaun likkhega

'hijab' is shahr-e-na-pursan mein sab jhagDa ana ka hai

surur-e-KHud-parasti mein KHudi ko kaun likkhega