maine ai dil tujhe sine se lagaya hua hai

maiñ ne ai dil tujhe siine se lagāyā huā hai

aur tū hai ki mirī jaan ko aayā huā hai

bas isī bojh se dohrī huī jaatī hai kamar

zindagī kā jo ye ehsān uThāyā huā hai

kyā huā gar nahīñ bādal ye barasne vaalā

ye bhī kuchh kam to nahīñ hai jo ye aayā huā hai

raah chaltī huī is rāhguzar par 'ajmal'

ham samajhte haiñ qadam ham ne jamāyā huā hai

ham ye samjhe the ki ham bhuul ga.e haiñ us ko

aaj be-tarah hameñ yaad jo aayā huā hai

vo kisī roz havāoñ kī tarah aa.egā

raah meñ jis kī diyā ham ne jalāyā huā hai

kaun batlā.e use apnā yaqīñ hai ki nahīñ

vo jise ham ne ḳhudā apnā banāyā huā hai

yūñhī dīvāna banā phirtā hai varna 'ajmal'

dil meñ baiThā huā hai zehn pe chhāyā huā hai

main ne ai dil tujhe sine se lagaya hua hai

aur tu hai ki meri jaan ko aaya hua hai

bas isi bojh se dohri hui jati hai kamar

zindagi ka jo ye ehsan uThaya hua hai

kya hua gar nahin baadal ye barasne wala

ye bhi kuchh kam to nahin hai jo ye aaya hua hai

rah chalti hui is rahguzar par 'ajmal'

hum samajhte hain qadam hum ne jamaya hua hai

hum ye samjhe the ki hum bhul gae hain us ko

aaj be-tarah hamein yaad jo aaya hua hai

wo kisi roz hawaon ki tarah aaega

rah mein jis ki diya hum ne jalaya hua hai

kaun batlae use apna yaqin hai ki nahin

wo jise hum ne KHuda apna banaya hua hai

yunhi diwana bana phirta hai warna 'ajmal'

dil mein baiTha hua hai zehn pe chhaya hua hai