maine virane ko gulzar bana rakkha hai

maiñ ne vīrāne ko gulzār banā rakkhā hai

kyā burā hai jo haqīqat ko chhupā rakkhā hai

daur-e-hāzir meñ koī kaash zamīñ se pūchhe

aaj insān kahāñ tū ne chhupā rakkhā hai

vo to ḳhud-ġharzī hai lālach hai havas hai jin kā

naam is daur ke insāñ ne vafā rakkhā hai

vo mire sahn meñ barsegā kabhī to khul kar

maiñ ne ḳhvāhish kā shajar kab se lagā rakkhā hai

maiñ to mushtāq huuñ āñdhī meñ bhī uḌne ke liye

maiñ ne ye shauq ajab dil ko lagā rakkhā hai

maiñ ki aurat huuñ mirī sharm hai merā zevar

bas taḳhallus isī baa.is to 'hayā' rakkhā hai

main ne virane ko gulzar bana rakkha hai

kya bura hai jo haqiqat ko chhupa rakkha hai

daur-e-hazir mein koi kash zamin se puchhe

aaj insan kahan tu ne chhupa rakkha hai

wo to KHud-gharzi hai lalach hai hawas hai jin ka

nam is daur ke insan ne wafa rakkha hai

wo mere sahn mein barsega kabhi to khul kar

main ne KHwahish ka shajar kab se laga rakkha hai

main to mushtaq hun aandhi mein bhi uDne ke liye

main ne ye shauq ajab dil ko laga rakkha hai

main ki aurat hun meri sharm hai mera zewar

bas taKHallus isi bais to 'haya' rakkha hai