main sadqe tujh pe ada tere muskurane ki

maiñ sadqe tujh pe adā tere muskurāne kī

sameTe letī hai rañgīniyāñ zamāne kī

jo zabt-e-shauq ne bāñdhā tilism-e-ḳhuddārī

shikāyat aap kī rūThī huī adā ne kī

kuchh aur jur.at-e-dast-e-havas baḌhātī hai

vo barhamī jo ho tamhīd muskurāne kī

kuchh aisā rang mirī zindagī ne pakḌā thā

ki ibtidā hī se tarkīb thī fasāne kī

jalāne vaale jalāte hī haiñ charāġh āḳhir

ye kyā kahā ki havā tez hai zamāne kī

havā.eñ tund haiñ aur kis qadar haiñ tund 'jamīl'

ajab nahīñ ki badal jaa.e rut zamāne kī

main sadqe tujh pe ada tere muskurane ki

sameTe leti hai ranginiyan zamane ki

jo zabt-e-shauq ne bandha tilism-e-KHuddari

shikayat aap ki ruThi hui ada ne ki

kuchh aur jurat-e-dast-e-hawas baDhati hai

wo barhami jo ho tamhid muskurane ki

kuchh aisa rang meri zindagi ne pakDa tha

ki ibtida hi se tarkib thi fasane ki

jalane wale jalate hi hain charagh aaKHir

ye kya kaha ki hawa tez hai zamane ki

hawaen tund hain aur kis qadar hain tund 'jamil'

ajab nahin ki badal jae rut zamane ki