manzar-e-sarw-o-saman yaad aaya

manzar-e-sarv-o-saman yaad aayā

phir se gum-gashta vatan yaad aayā

pīchhe ab kyā hai ġhubār-e-rafta

dahr meñ bāġh-e-adan yaad aayā

bāl-o-par TuuT chuke the jis vaqt

hameñ parvāz kā fan yaad aayā

phir kisī shāḳh pe koyal bolī

phir tirā rañg-e-suḳhan yaad aayā

avval ik shaḳhs kī yaad aa.ī bahut

do.em ik saañp kā phan yaad aayā

ek din sochā ki ujle ho jaa.eñ

tan ko dhoyā thā ki man yaad aayā

ḳhuun sā rah gayā dil meñ jo shaḳhs

aaj phir ban ke chubhan yaad aayā

phir se dil Duub rahā hai 'betāb'

phir zamāne kā chalan yaad aayā

manzar-e-sarw-o-saman yaad aaya

phir se gum-gashta watan yaad aaya

pichhe ab kya hai ghubar-e-rafta

dahr mein bagh-e-adan yaad aaya

baal-o-par TuT chuke the jis waqt

hamein parwaz ka fan yaad aaya

phir kisi shaKH pe koyal boli

phir tera rang-e-suKHan yaad aaya

awwal ek shaKHs ki yaad aai bahut

doem ek sanp ka phan yaad aaya

ek din socha ki ujle ho jaen

tan ko dhoya tha ki man yaad aaya

KHun sa rah gaya dil mein jo shaKHs

aaj phir ban ke chubhan yaad aaya

phir se dil Dub raha hai 'betab'

phir zamane ka chalan yaad aaya