manzar hai abhi dur zara hadd-e-nazar se

manzar hai abhī duur zarā hadd-e-nazar se

sauġhāt-e-safar aur hai asbāb-e-safar se

tum mere ta.āqub kā tasavvur bhī na karnā

pūchho mirī manzil mire TuuTe hue par se

maiñ shar kī sharārat se to hoshyār huuñ lekin

allāh bachā.e to bachūñ ḳhair ke shar se

bārish ne mirī TuuTī huī chhat nahīñ dekhī

āñgan meñ lagī aag to bādal nahīñ barse

patthar na banā de mujhe mausam kī ye saḳhtī

mar jaa.eñ mire ḳhvāb na ta.abīr ke Dar se

dhul jaatā hai sab dard mirī ruuh kā is meñ

rahmat jo barastī hai mire dīda-e-tar se

tanhā.ī-pasandī mirī fitrat kā bhī juz thā

mausam bhī ye kahtā hai nikalnā nahīñ ghar se

insān koī ho to maiñ ta.avīz banā luuñ

duniyā mirī bad-tar huī bhūtoñ ke khañDar se

'pinhāñ' mirī ġhazloñ ko bahut naaz hai us par

tāsīr kī daulat jo milī dast-e-hunar se

manzar hai abhi dur zara hadd-e-nazar se

saughat-e-safar aur hai asbab-e-safar se

tum mere taaqub ka tasawwur bhi na karna

puchho meri manzil mere TuTe hue par se

main shar ki shararat se to hoshyar hun lekin

allah bachae to bachun KHair ke shar se

barish ne meri TuTi hui chhat nahin dekhi

aangan mein lagi aag to baadal nahin barse

patthar na bana de mujhe mausam ki ye saKHti

mar jaen mere KHwab na tabir ke Dar se

dhul jata hai sab dard meri ruh ka is mein

rahmat jo barasti hai mere dida-e-tar se

tanhai-pasandi meri fitrat ka bhi juz tha

mausam bhi ye kahta hai nikalna nahin ghar se

insan koi ho to main tawiz bana lun

duniya meri bad-tar hui bhuton ke khanDar se

'pinhan' meri ghazlon ko bahut naz hai us par

tasir ki daulat jo mili dast-e-hunar se