mauj-e-dariya ke labon par tishnagi hai karbala

mauj-e-dariyā ke laboñ par tishnagī hai karbalā

reg-e-sāhil par taḌaptī zindagī hai karbalā

sabr kī aur zabt kī ye manzileñ haiñ āḳhirī

azm ahl-e-bait kā kyā dekhtī hai karbalā

haq kabhī jhuktā nahīñ hai sar bhī kaT jaa.e agar

zehn-o-dil ke vāste ik āgahī hai karbalā

kyuuñ sakīna aur zainab is qadar ḳhāmosh haiñ

duur tak sahrā meñ dekho ḳhāmushī hai karbalā

miT gayā hai farq sab fardā meñ aur dīroz meñ

maat de kar raḳhsh-e-daurāñ ko chalī hai karbalā

tā-qayāmat zikr se raushan rahegī ye zamīñ

zulmatoñ kī shaam meñ ik raushnī hai karbalā

ai ġham-e-shām-e-ġharībāñ ai shab-e-tār-e-alam

ahl-e-dil ko roz-o-shab taḌpā rahī hai karbalā

mauj-e-dariya ke labon par tishnagi hai karbala

reg-e-sahil par taDapti zindagi hai karbala

sabr ki aur zabt ki ye manzilen hain aaKHiri

azm ahl-e-bait ka kya dekhti hai karbala

haq kabhi jhukta nahin hai sar bhi kaT jae agar

zehn-o-dil ke waste ek aagahi hai karbala

kyun sakina aur zainab is qadar KHamosh hain

dur tak sahra mein dekho KHamushi hai karbala

miT gaya hai farq sab farda mein aur diroz mein

mat de kar raKHsh-e-dauran ko chali hai karbala

ta-qayamat zikr se raushan rahegi ye zamin

zulmaton ki sham mein ek raushni hai karbala

ai gham-e-sham-e-ghariban ai shab-e-tar-e-alam

ahl-e-dil ko roz-o-shab taDpa rahi hai karbala