na jaane kyun sada hota hai ek sa anjam

na jaane kyuuñ sadā hotā hai ek sā anjām

ham ek sī to kahānī sadā nahīñ kahte

jidhar pahuñchnā hai āġhāz bhī vahīñ se huā

safar samajhte haiñ is ko sazā nahīñ kahte

nayā shu.ūr na.e isti.āre laatā hai

azal se log ḳhudā ko ḳhudā nahīñ kahte

jo giit chunte haiñ ḳhāmoshiyoñ ke sahrā se

vo lab-kushāoñ ko rāz-āshnā nahīñ kahte

fazā kā lafz hai us ke liye alag maujūd

jo ghar Thahartī hai us ko havā nahīñ kahte

zamāne bhar se ulajhte haiñ jis kī jānib se

akele-pan meñ use ham bhī kyā nahīñ kahte

jo dekh lete haiñ chīzoñ ke ār-pār 'malāl'

kisī bhī chiiz ko itnā burā nahīñ kahte

na jaane kyun sada hota hai ek sa anjam

hum ek si to kahani sada nahin kahte

jidhar pahunchna hai aaghaz bhi wahin se hua

safar samajhte hain is ko saza nahin kahte

naya shuur nae istiare lata hai

azal se log KHuda ko KHuda nahin kahte

jo git chunte hain KHamoshiyon ke sahra se

wo lab-kushaon ko raaz-ashna nahin kahte

faza ka lafz hai us ke liye alag maujud

jo ghar Thaharti hai us ko hawa nahin kahte

zamane bhar se ulajhte hain jis ki jaanib se

akele-pan mein use hum bhi kya nahin kahte

jo dekh lete hain chizon ke aar-par 'malal'

kisi bhi chiz ko itna bura nahin kahte