pas-e-tauba hadīs-e-mutrib-o-paimāna kahte haiñ
ye ik bhūlā huā par aaj ham afsāna kahte haiñ
koī ḳhūn-e-tamannā ho jhalak aatā hai ā.ankhoñ meñ
isī ko ittihād-e-bāda-o-paimāna kahte haiñ
tabāhī dil kī dekhī hai jo ham ne apnī ā.ankhoñ se
ho ab kaisī hī bastī ham use vīrāna kahte haiñ
fanā hone meñ soz-e-sham.a kī minnat-kashī kaisī
jale jo aag meñ apnī use parvāna kahte haiñ
jafā par sabr sīkhā hai vafā par jaan jaatī hai
yahī hai aur kis ko tohmat-e-mardāna kahte haiñ
tumhārī zulf-e-pechāñ meñ rahā kyūñ-kar dil-e-vahshī
tuḌā le jaa.e jo zanjīr use dīvāna kahte haiñ
ma.āz-allāh terā husn terī bazm-e-ishrat meñ
ye vo mahfil hai jis meñ sham.a ko parvāna kahte haiñ
yahāñ to jaan tak de dī 'nazar' pādāsh-e-ulfat meñ
magar bedād-gar baaqī abhī jurmāna kahte haiñ
pas-e-tauba hadis-e-mutrib-o-paimana kahte hain
ye ek bhula hua par aaj hum afsana kahte hain
koi KHun-e-tamanna ho jhalak aata hai aaankhon mein
isi ko ittihad-e-baada-o-paimana kahte hain
tabahi dil ki dekhi hai jo hum ne apni aaankhon se
ho ab kaisi hi basti hum use virana kahte hain
fana hone mein soz-e-shama ki minnat-kashi kaisi
jale jo aag mein apni use parwana kahte hain
jafa par sabr sikha hai wafa par jaan jati hai
yahi hai aur kis ko tohmat-e-mardana kahte hain
tumhaari zulf-e-pechan mein raha kyun-kar dil-e-wahshi
tuDa le jae jo zanjir use diwana kahte hain
maaz-allah tera husn teri bazm-e-ishrat mein
ye wo mahfil hai jis mein shama ko parwana kahte hain
yahan to jaan tak de di 'nazar' padash-e-ulfat mein
magar bedad-gar baqi abhi jurmana kahte hain
Source:
Deewan-e-Sharf Mujaddidi (Pg. ebook-28 page-6)
-
Author:
Abdul Qadir Mujaddidi
-
- Edition: 1937
- Publisher: Raees-ul-Matabe, Kanpur
- Year of Publication: 1937
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.