pyas har zarra-e-sahra ki bujhai gai hai

pyaas har zarra-e-sahrā kī bujhā.ī ga.ī hai

tab kahīñ jā ke mirī ābla-pā.ī ga.ī hai

qaid meñ rakkhī ga.ī hai kahīñ titlī koī

koī ḳhushbū kahīñ bāzār meñ laa.ī ga.ī hai

kyā bhalā apnī samā.at meñ ghule koī miThās

vaqt ke hoñToñ se kab talḳh-navā.ī ga.ī hai

kis kī tanvīr se jal uTThe basīrat ke charāġh

kis kī tasvīr ye āñkhoñ se lagā.ī ga.ī hai

ho ga.ī jā ke shafaq-rañgī-e-āfāq meñ zam

kaf-e-doshīza-e-dil se jo hinā.ī ga.ī hai

uTh ai barbād-e-tamannā kī na.ī ḳhvāb--kanīz

haram-e-chashm meñ phir raqs ko laa.ī ga.ī hai

vaqt aisā bhī to aayā hai junūñ par 'sārim'

nok-e-mizhgān se talvār uThā.ī ga.ī hai

pyas har zarra-e-sahra ki bujhai gai hai

tab kahin ja ke meri aabla-pai gai hai

qaid mein rakkhi gai hai kahin titli koi

koi KHushbu kahin bazar mein lai gai hai

kya bhala apni samaat mein ghule koi miThas

waqt ke honTon se kab talKH-nawai gai hai

kis ki tanwir se jal uTThe basirat ke charagh

kis ki taswir ye aankhon se lagai gai hai

ho gai ja ke shafaq-rangi-e-afaq mein zam

kaf-e-doshiza-e-dil se jo hinai gai hai

uTh ai barbaad-e-tamanna ki nai KHwab--kaniz

haram-e-chashm mein phir raqs ko lai gai hai

waqt aisa bhi to aaya hai junun par 'sarim'

nok-e-mizhgan se talwar uThai gai hai