rakhna KHam-e-gesu mein ya dil ko riha karna

rakhnā ḳham-e-gesū meñ yā dil ko rihā karnā

kuchh kah to sahī zālim āḳhir tujhe kyā karnā

kyā tum se ziyāda hai duniyā meñ hasīñ koī

īmān se kah denā insāf zarā karnā

sahnī bhī jafā un kī karnī bhī vafā un se

un kī bhī ḳhushī karnī dil kā bhī kahā karnā

bosa bhī mujhe denā hoñToñ meñ bhī kuchh kahnā

jiine kī davā denā marne kī duā karnā

tirchhī chitvan ne lākhoñ hī kiye bismil

ai turk tirā nāvak kyā jaane ḳhatā karnā

be-dād kā ab shikva bejā hai 'nasīm' un se

thā tum ko mohabbat kā iz.hār hī kyā karnā

rakhna KHam-e-gesu mein ya dil ko riha karna

kuchh kah to sahi zalim aaKHir tujhe kya karna

kya tum se ziyaada hai duniya mein hasin koi

iman se kah dena insaf zara karna

sahni bhi jafa un ki karni bhi wafa un se

un ki bhi KHushi karni dil ka bhi kaha karna

bosa bhi mujhe dena honTon mein bhi kuchh kahna

jine ki dawa dena marne ki dua karna

tirchhi chitwan ne lakhon hi kiye bismil

ai turk tera nawak kya jaane KHata karna

be-dad ka ab shikwa beja hai 'nasim' un se

tha tum ko mohabbat ka izhaar hi kya karna