raushan kar ke uske nam ki lau dil mein

raushan kar ke us ke naam kī lau dil meñ

maiñ ne bhī us ko Daal diyā ik mushkil meñ

ye āvāzeñ merī hī paidā-karda haiñ

guuñj rahā huuñ maiñ duniyā ke har dil meñ

maiñ bhī aañkh kī oT meñ chhup ke baiThā thā

vo bhī DhūñD rahā thā mujh ko mahfil meñ

chuum rahā huuñ us ke ik ik vaar ko maiñ

jaane maiñ ne dekh liyā kyā qātil meñ

is ko lahū kahūñ yā naqsh-e-shola-e-jāñ

bas ik mauj-e-sarāb thī raqsāñ is dil meñ

us ko khonā asl meñ us ko paanā hai

hāsil kā hī partav hai lā-hāsil meñ

ye asrār khulā bhī to jaañ dene par

'tūr' nihāñ thā maiñ bhī kahīñ us ke dil meñ

raushan kar ke us ke nam ki lau dil mein

main ne bhi us ko Dal diya ek mushkil mein

ye aawazen meri hi paida-karda hain

gunj raha hun main duniya ke har dil mein

main bhi aankh ki oT mein chhup ke baiTha tha

wo bhi DhunD raha tha mujh ko mahfil mein

chum raha hun us ke ek ek war ko main

jaane main ne dekh liya kya qatil mein

is ko lahu kahun ya naqsh-e-shola-e-jaan

bas ek mauj-e-sarab thi raqsan is dil mein

us ko khona asl mein us ko pana hai

hasil ka hi partaw hai la-hasil mein

ye asrar khula bhi to jaan dene par

'tur' nihan tha main bhi kahin us ke dil mein