ruh ko pahle KHaksar kiya

ruuh ko pahle ḳhāksār kiyā

phir badan maiñ ne taar taar kiyā

dard ko shola-e-ḳhumār kiyā

shīsha-e-ġham ko sharmsār kiyā

uñgliyāñ uThte uThte girne lagīñ

ham ne jab āsmān paar kiyā

maiñ nihattā thā kaise bach paatā

aur pīchhe se us ne vaar kiyā

rā.egāñ ho rahī thī tanhā.ī

terī yādoñ kā kārobār kiyā

jab nazar meñ girah paḌī dekhī

shab ne ḳhvāboñ ko āb-dār kiyā

dil ke sajde lahū-luhān hue

kin duāoñ ne beḌā paar kiyā

log kitne bichhaḌ ga.e 'sājid'

ḳhud ko ham ne bhī be-hisār kiyā

ruh ko pahle KHaksar kiya

phir badan main ne tar tar kiya

dard ko shola-e-KHumar kiya

shisha-e-gham ko sharmsar kiya

ungliyan uThte uThte girne lagin

hum ne jab aasman par kiya

main nihatta tha kaise bach pata

aur pichhe se us ne war kiya

raegan ho rahi thi tanhai

teri yaadon ka karobar kiya

jab nazar mein girah paDi dekhi

shab ne KHwabon ko aab-dar kiya

dil ke sajde lahu-luhan hue

kin duaon ne beDa par kiya

log kitne bichhaD gae 'sajid'

KHud ko hum ne bhi be-hisar kiya