saba se aati hai kuchh bu-e-ashna mujhko

sabā se aatī hai kuchh bu-e-āshnā mujh ko

bulā rahā hai mire ḳhuuñ kā zā.iqa mujh ko

hanūz safha-e-hastī pe huuñ maiñ harf-e-ġhalat

koī hanūz hai likh likh ke kāTtā mujh ko

hazār chehra tilism-e-gurez-pā huuñ maiñ

asiir kar na sakā koī aa.inā mujh ko

chalā hī jā.ūñ maiñ parchhā.iyoñ ke des ko aur

pukārtā rahe kirnoñ kā qāfila mujh ko

yahī haiñ rat-jage jab se khulīñ mirī āñkheñ

na thā vo ḳhvāb mirā ik azaab thā mujh ko

chalā thā maiñ to samundar kī tishnagī le kar

milā ye kaisā sarāboñ kā silsila mujh ko

ye baat kis se kahūñ aah ik gul-e-ḳhūbī

baḌe hī pyaar se kāñTā chubho gayā mujh ko

saba se aati hai kuchh bu-e-ashna mujh ko

bula raha hai mere KHun ka zaiqa mujh ko

hanuz safha-e-hasti pe hun main harf-e-ghalat

koi hanuz hai likh likh ke kaTta mujh ko

hazar chehra tilism-e-gurez-pa hun main

asir kar na saka koi aaina mujh ko

chala hi jaun main parchhaiyon ke des ko aur

pukarta rahe kirnon ka qafila mujh ko

yahi hain rat-jage jab se khulin meri aankhen

na tha wo KHwab mera ek azab tha mujh ko

chala tha main to samundar ki tishnagi le kar

mila ye kaisa sarabon ka silsila mujh ko

ye baat kis se kahun aah ek gul-e-KHubi

baDe hi pyar se kanTa chubho gaya mujh ko