sarab-e-mani-o-mafhum mein bhaTakte hain

sarāb-e-ma.anī-o-mafhūm meñ bhaTakte haiñ

kuchh aise lafz jo shāyad azal se pyāse haiñ

samā.atoñ ko abhī yuuñ hī muntazir rakhnā

pas-e-ġhubār-e-ḳhamoshī hazār naġhme haiñ

añdhere kitne hī saffāk hoñ ki zālim hoñ

magar charāġh kī nannhī sī lau se Darte haiñ

ye kis ḳhayāl kī lau se lipaT rahī hai havā

ye kis kī yaad ke saa.e se thartharāte haiñ

yahī nahīñ ki kisī yaad ne malūl kiyā

kabhī kabhī to yūñhī be-sabab bhī ro.e haiñ

bikhar ke bhī to hameñ ā.īna hī rahnā hai

harīf-e-sañg kahīñ TūTne se Darte haiñ

safar the paañv meñ 'aslam' to manzileñ sar meñ

magar ab apnī hī parchhā.iyoñ se lipTe haiñ

sarab-e-mani-o-mafhum mein bhaTakte hain

kuchh aise lafz jo shayad azal se pyase hain

samaaton ko abhi yun hi muntazir rakhna

pas-e-ghubar-e-KHamoshi hazar naghme hain

andhere kitne hi saffak hon ki zalim hon

magar charagh ki nannhi si lau se Darte hain

ye kis KHayal ki lau se lipaT rahi hai hawa

ye kis ki yaad ke sae se thartharaate hain

yahi nahin ki kisi yaad ne malul kiya

kabhi kabhi to yunhi be-sabab bhi roe hain

bikhar ke bhi to hamein aaina hi rahna hai

harif-e-sang kahin TuTne se Darte hain

safar the panw mein 'aslam' to manzilen sar mein

magar ab apni hi parchhaiyon se lipTe hain